ବିବାହ ପୁର୍ବ ଯୋଗାଯୋଗ କେନ୍ଦ୍ର (ପି.ଏମ.ସି.ସି.)-ତେରେ ମେରେ ସପନେର ଉଦଘାଟନ
ରେମୁଣା, ତା:୧୭.୨.୨୦୨୬, ଆଜି, ଜାତୀୟ ମହିଳା କମିଶନରଙ୍କ ପରାମର୍ଶରେ ପରିଚାଳିତ "ତେରେ ମେରେ ସପନେ" ନାମରେ ପ୍ରାକ୍ ବିବାହ ଯୋଗାଯୋଗ କେନ୍ଦ୍ର (ପି.ଏମ.ସି.ସି.) ଅପରାହ୍ନ ୩.୩୦ ସମୟରେ ଫକୀର ମୋହନ ବିଶ୍ୱବିଦ୍ୟାଳୟ ର ପିଜି କାଉନସିଲର ସମ୍ମିଳନୀ କକ୍ଷରେ ଏକ ଅଗ୍ରଣୀ ସାମାଜିକ ସଂଗଠନ ରୁରାଲ ଡେଭଲପମେଂଟ ଫାଉଣ୍ଡେସନ ଦ୍ୱାରା ଆୟୋଜିତ ହୋଇଛି। ଏହି ଉତ୍ସବରେ ମୁଖ୍ୟ ଅତିଥି ଫକୀର ମୋହନ ବିଶ୍ୱବିଦ୍ୟାଳୟର ମାନ୍ୟବର କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠି, ମୁଖ୍ୟ ବକ୍ତା ଓଡ଼ିଶା ରାଜ୍ୟ ମହିଳା କମିଶନର ମାନ୍ୟବର ଅଧ୍ୟକ୍ଷା ଶ୍ରୀମତୀ ସୋଭନା ମହାନ୍ତି ଏବଂ ସଦସ୍ୟା ଶ୍ରୀମତୀ ମୁକ୍ତା ସାହୁ ଓ ଶ୍ରୀମତୀ ପ୍ରତିଭା ଶତପଥୀଙ୍କ ଦ୍ୱାରା ଉଦ୍ଘାଟିତ ହୋଇଛି। ବିଶ୍ୱବିଦ୍ୟାଳୟର ସାମାଜିକ ବିଜ୍ଞାନ ବିଭାଗର ମୁଖ୍ୟ, ପ୍ରଫେସର ପବିତ୍ର ମୋହନ ନାୟକ ଅତିଥିମାନଙ୍କୁ ସ୍ୱାଗତ କରିଥିଲେ। ବିଶ୍ୱବିଦ୍ୟାଳୟର ସହକାରୀ ପ୍ରାଧ୍ୟାପିକା ରାଜଶ୍ରୀ ଦତ୍ତ କାର୍ଯ୍ୟକ୍ରମ ପରିଚାଳନା କରିଥିଲେ। ବିଶ୍ୱବିଦ୍ୟାଳୟର ପ୍ରାୟ ୨୦୦ ଛାତ୍ରଛାତ୍ରୀ ସମେତ ଅଧିକାଂଶ ବିଭାଗର ଶିକ୍ଷକ ଓ ଶିକ୍ଷୟତ୍ରୀ କାର୍ଯ୍ୟକ୍ରମରେ ଅଂଶଗ୍ରହଣ କରିଛନ୍ତି। ମଞ୍ଚରେ ଉପସ୍ଥିତ ବିଶିଷ୍ଟ ବ୍ୟକ୍ତି ଓ ସମ୍ମାନିତ ଅତିଥିମାନେ ଉତ୍ତମ ଦାମ୍ପତ୍ୟ ଜୀବନ ପାଇଁ ବର୍ତ୍ତମାନ ସମାଜରେ ବିବାହ ପୂର୍ବ ଯୋଗାଯୋଗ କେନ୍ଦ୍ର (ପି.ଏମ.ସି.ସି.)ର ଆବଶ୍ୟକତା ଉପରେ ଆଲୋକପାତ କରିଛନ୍ତି।
ବୈଷୟିକ ଅଧିବେଶନରେ, ରୁରାଲ ଡେଭଲପମେଂଟ ଫାଉଣ୍ଡେସନ ସମ୍ପାଦକ ଶ୍ରୀ ହରିଶ ଚନ୍ଦ୍ର ରାଜ ଏବଂ ପି.ଏମ.ସି.ସି. କେନ୍ଦ୍ରର ମୁଖ୍ୟ ଶ୍ରୀ ବିଜୟ କୁମାର ଆଚାର୍ଯ୍ୟ ଦାମ୍ପତ୍ୟ ସମ୍ପର୍କ ଗଠନରେ ମାର୍ଗଦର୍ଶନ, ମାନସିକ ଏବଂ ଭାବପ୍ରବଣ ସୁସ୍ଥତା ପାଇଁ ସମର୍ଥନ, ପରିବାର ବ୍ୟବସ୍ଥାକୁ ସୁଦୃଢ଼ କରିବା, ଛାଡପତ୍ର ଏବଂ ପୃଥକୀକରଣର ସମ୍ଭାବନା ହ୍ରାସ କରିବା, ସାମାଜିକ ସଚେତନତା, ମାନସିକ ଚାପ ହ୍ରାସ ଓ ନିରାଶ ମୁକ୍ତ, ବିବାହ ପୂର୍ବରୁ ଯୁକ୍ତିଯୁକ୍ତ ଏବଂ ଶାନ୍ତିପୂର୍ଣ୍ଣ ବୈବାହିକ ଜୀବନ ଗଠନ ପାଇଁ ବିବାହଯୋଗ୍ୟ ଯୁବକ ଯୁବତୀଙ୍କୁ ଏବଂ ସେମାନଙ୍କ ପିତାମାତା ଏବଂ ନିକଟତମ ବ୍ୟକ୍ତିଙ୍କୁ ଦ୍ୱନ୍ଦ୍ୱ ସମାଧାନ ପ୍ରଦାନ କରିବାରେ ପି.ଏମ.ସି.ସି.ର ପୃଷ୍ଠଭୂମି ଏବଂ ଲାଭ ବିଷୟରେ ବର୍ଣ୍ଣନା କରିଥିଲେ। ସ୍ୱେଚ୍ଛାସେବୀ କବିତା ସିଂ ସମେତ ବିଶ୍ୱବିଦ୍ୟାଳୟର କର୍ମଚାରୀ ଓ ଛାତ୍ରଛାତ୍ରୀ ଏବଂ ପି.ଏମ.ସି.ସି. ଓ ପରିବାର ପରାମର୍ଶ କେନ୍ଦ୍ରର କାଉନସିଲରମାନେ ଉତ୍ସବକୁ ସଫଳ କରିବାରେ ସାହାଯ୍ୟ କରିଥିଲେ। ବିଶ୍ୱବିଦ୍ୟାଳୟର ଜନସଂଖ୍ୟା ଅଧ୍ୟୟନ ବିଭାଗର ସହକାରୀ ପ୍ରଫେସର ଡକ୍ଟର ଗ୍ରେସ ବାହାଲେନ ମୁଣ୍ଡୁ ଧନ୍ୟବାଦ ଅର୍ପଣ କରିଥିଲେ। ବିଶ୍ୱବିଦ୍ୟାଳୟର ପି.ଜି. କାଉନସିଲ ର ଅଧ୍ୟକ୍ଷ ପ୍ରଫେସର ଭାସ୍କର ଚନ୍ଦ୍ର ବେହେରା ଉତ୍ସବକୁ ସାଙ୍ଗ କରାଇବା ପରେ ସନ୍ଧ୍ୟା ୭.୦୦ ଟାରେ, ଓଡ଼ିଶା ରାଜ୍ୟ ମହିଳା କମିଶନ ଅଧ୍ୟକ୍ଷା ଶ୍ରୀମତୀ ଶୋଭନା ମହାନ୍ତି ଏବଂ ସଦସ୍ୟା ଶ୍ରୀମତୀ ମୁକ୍ତା ସାହୁ ଓ ଶ୍ରୀମତୀ ପ୍ରତିଭା ଶତପଥୀ ବାଲେଶ୍ୱର ଟାଉନର ସହଦେବଖୁଣ୍ଟାରେ ରିବନ କାଟି ପି.ଏମ.ସି.ସି.: ତେରେ ମେରେ ସପନେକୁ ଉନ୍ମୋଚନ କରିଛନ୍ତି |
