ଆଜି ରଙ୍ଗର ପର୍ବ ହୋଲି: ସମଗ୍ର କୋରାପୁଟ ସହର ଉତ୍ସବ ମୁଖର

କୋରାପୁଟ : ଆଜି ରଙ୍ଗର ପର୍ବ ହୋଲି । ବସନ୍ତ ଋତୁରେ ଫଗୁଣ ମାସରେ ପୂର୍ଣ୍ଣମୀ ତିଥିରେ ଏହି ପର୍ବ ପାଳନ ହୁଏ । ଗାଁ ଠୁ ସହର ସବୁଠି ଉତ୍ସବମୁଖର ପରିବେଶ । ପରସ୍ପରକୁ ରଙ୍ଗ ଲଗାଇ ହୋଲିର ଶୁଭକାମନା ଜଣାଉଛନ୍ତି ସମସ୍ତେ । ଘରେ ହେଉ କି ବାହାରେ ପରସ୍ପର ମଧ୍ୟରେ ସ୍ନେହ ଓ ଆଦର ବାଣ୍ଟି ଚାଲିଛି ଏହି ରଙ୍ଗ ଖେଳି । କିଏ କାହାକୁ ପିଚକାରୀ ଧରି ରଙ୍ଗ ମାରୁଛି ତ ପୁଣି କିଏ ଅବିରରେ ଖେଳୁଛନ୍ତି ହୋଲି । ପରିବାର ଓ ବନ୍ଧୁ ପ୍ରିୟଜନଙ୍କୁ ନେଇ ରଙ୍ଗ ଖେଳରେ ମସଗୁଲ ଅଛନ୍ତି ସଭିଏଁ l ପୌରାଣିକ ତତ୍ତ୍ୱ ଅନୁସାରେ ରାଧାକୃଷ୍ଣଙ୍କ ପ୍ରେମର ପ୍ରମାଣ ହେଉଛି ହୋଲି ଖେଳ । ସେନେଇ ହୋଲି ପୂର୍ବଦିନ ଅର୍ଥାତ୍ ଦୋଳଯାତ୍ରା ଦିନ ଅନେକ ସ୍ଥାନରେ ଲୋକେ ରାଧାକୃଷ୍ଣଙ୍କୁ ସୁସଜ୍ଜିତ ବିମାନରେ ବସାଇ ଘରକୁ ଘର ବୁଲିଥାନ୍ତି । ଏହାପରେ ସବୁ ବିମାନଙ୍କୁ ଦୋଳ ମଣ୍ଡପରେ ବସାଇ ପାଞ୍ଚ ଦିନ ବ୍ୟାପୀ ପୂଜାର୍ଚ୍ଚନା କରାଯାଏ । ଏହାକୁ ପଞ୍ଚୁଦୋଳ ପର୍ବ ବୋଲି କୁହାଯାଏ । ଏହାପରେ ରଙ୍ଗ ଖେଳ ହୋଇଥାଏ l ରଙ୍ଗ ପର୍ବ କୁ ନେଇ ରାଜ୍ୟର ବିଭିନ୍ନ ସ୍ଥାନରେ ସ୍ବତନ୍ତ୍ର ଆୟୋଜନ ହୋଇଛି l ଏହି ଅବସରରେ କୋରାପୁଟର ବିଭିନ୍ନ ସ୍ଥାନରେ ହୋଲି ଉତ୍ସବ ସୁରୁଖୁରୁରେ ପାଳନ ହୋଇଯାଇଅଛି l ପିଲାଠୁ ବୁଢା ପର୍ଯ୍ୟନ୍ତ ସମସ୍ତ ଜନସାଧାରଣ ଏହି ଆନନ୍ଦର ଉତ୍ସବ ହୋଲିକୁ ପାଳନ କରିବାକୁ ଆଗେଇ ଆସି ପରସ୍ପର ମଧ୍ୟରେ ଖୁସି ବାଣ୍ଟିଥିବା ଦେଖିବାକୁ ମିଳିଅଛି l